Piers Plowman Electronic Archive

Piers Plowman Electronic Archive

Cambridge MS B.15.17 (W)

Passus 12

Scribal | Critical | All Tags

Next: Passus 13 Previous: Passus 11 Up: Contents


fol.67v


Passus .xijus.^683(c)
W12.1	I am ymaginatif quod he · ydel was I neuere
W12.2	Thouȝ I sitte by my-self · in siknesse nor⁶⁸⁴ in helþe
W12.3	I haue folwed þee in feiþ · þise fyue and fourty wynter
W12.4	And manye tymes haue meued þee · to þynke on þyn ende
W12.5	And how fele fernyeres are faren · and so fewe to come
W12.6	And of þi wilde wantownesse · þo þow yong were
W12.7	To amende it in þi myddel age · lest myȝt þe failled
W12.8	In þyn olde elde · þat yuele kan suffre
W12.9	Pouerte or penaunce · or preyeres to bidde
W12.10	Si non in prima vigilia nec in secunda &c


W12.11	¶ Amende þee while þow myȝt · þow hast ben warned ofte ⁶⁸⁵⁽ⁿ⁾
W12.12	Wiþ poustees of pestilences · wiþ pouerte and with angres
W12.13	And wiþ þise bittre baleises · god beteþ his deere children
W12.14	Quem diligo castigo


W12.15	¶ And Dauid in þe Sauter seiþ · of swiche þat loueþ Iesus
W12.16	Virga tua & baculus tuus ipsa me consolata sunt


W12.17	¶ Al-þouȝ þow strike me wiþ þi staf · wiþ stikke or wiþ yerde ⁶⁸⁶⁽ⁿ⁾
W12.18	It is but murþe as for me · to amende my soule ⁶⁸⁷⁽ⁿ⁾
W12.19	And þow medlest þee wiþ makynges · and myȝtest go seye þi sauter
W12.20	And bidde for hem þat ȝyueþ þee breed · for þer are bokes yknowe⁶⁸⁸
W12.21	To telle men what dowel is · dobet and dobest boþe
W12.22	And prechours to preuen what it is · of many a peire freres


W12.23	¶ I seiȝ wel he seide me sooþ · and som-what me to excuse
W12.24	Seide Caton conforted me his sone · þat clerk þouȝ he were
W12.25	To solacen hym som-tyme · as I do whan I make
W12.26	Interpone tuis interdum gaudia curis


W12.27	¶ And of holy men I herde quod I · how þei ouþer-while
W12.28	Pleyden þe parfiter · to ben in manye places
W12.29	Ac if þer were any wight · þat wolde me telle
fol.68r
W12.30	What were do-wel · and dobet · and do-best at þe laste
W12.31	Wolde I neuere do werk · but wende to holichirche
W12.32	And þere bidde my bedes · but whan ich ete or slepe


W12.33	¶ Poul in his pistle quod he · preueþ what is dowel
W12.34	Fides / spes / caritas · et maior horum &c
W12.35	Feiþ / hope / and Charite · and alle ben goode
W12.36	And sauen men sondry tymes · ac noon so soone as Charite
W12.37	For he dooþ wel wiþ-outen doute · þat dooþ as lewte techeþ
W12.38	That is if þow be man maryed · þi make þow louye
W12.39	And lyue forþ as lawe wole · while ye lyuen boþe


W12.40	¶ Riȝt so if þow be Religious · ren þow neuere ferþer
W12.41	To Rome ne to Rochemador · but as þi rule techeþ
W12.42	And hold þee vnder obedience · þat heigh wey is to heuene


W12.43	¶ And if þow be maiden to marye · and myȝt wel continue
W12.44	Seke þow neuere Seint ferþer · for no soule helþe
W12.45	For what made lucifer · to lese þe heiȝe heuene
W12.46	Or Salomon his sapience · or Sampson his strengþe
W12.47	Iob þe Iew his ioye · ful deere⁶⁸⁹ abouȝte
W12.48	Aristotle and oþere mo · ypocras and virgile
W12.49	Alisaundre þat al wan · elengliche ended
W12.50	Catel and kynde wit · was combraunce to hem alle


W12.51	¶ Felice hir fairnesse · fel hire al to sclaundre
W12.52	And Rosamounde riȝt so · reufulliche to bileue
W12.53	The beaute of hir body · in baddenesse she despended
W12.54	Of manye swiche I may rede · of men and of wommen ⁶⁹⁰⁽ⁿ⁾
W12.55	That wise wordes wolde shewe · and werche þe contrarie ⁶⁹¹⁽ⁿ⁾
W12.56	Sunt homines nequam bene de virtute loquentes


W12.57	¶ And riche renkes riȝt so · gaderen and sparen
W12.58	And þo men þat þei moost haten · mynistren it at þe laste
fol.68v
W12.59	And for þei suffren and see · so manye nedy folkes
W12.60	And loue hem noȝt as oure lord bit · þei lesen hir soules
W12.61	Date & dabitur vobis


W12.62	¶ And Richesse riȝt so · but if þe roote be trewe
W12.63	Ac grace is a gras þer-of · þo greuaunces to abate
W12.64	Ac grace ne groweþ noȝt · but amonges lowe
W12.65	Pacience and pouerte · þe place hiȝte⁶⁹² þer it groweþ
W12.66	And in lele lyuynge men · and in lif-holy
W12.67	And þoruȝ þe gifte of þe holy goost · as þe gospel telleþ
W12.68	Spiritus vbi vult spirat


W12.69	¶ Clergie and kynde wit · comeþ of siȝte and techyng
W12.70	As þe book bereþ witnesse · to burnes þat kan rede
W12.71	Quod scimus loquimur · quod vidimus testamur


W12.72	¶ Ofquod scimus comeþ Clergie · and konnynge of heuene
W12.73	And of quod vidimus comeþ kynde wit · of siȝte of diuerse peple
W12.74	Ac grace is a gifte of god · and of greet loue spryngeþ
W12.75	Knew neuere clerk how it comeþ forþ · ne kynde wit þe weyes
W12.76	Nescit aliquis vnde venit · aut quo vadit^693(c) &c


W12.77	¶ Ac yet is Clergie to comende · and kynde wit boþe
W12.78	And namely Clergie for cristes loue · þat of Clergie is roote
W12.79	For Moyses witnesseþ þat god wroot · for to wisse þe peple
W12.80	In þe olde lawe as þe lettre telleþ · þat was þe lawe of Iewes
W12.81	That what womman were in auoutrye taken · where she⁶⁹⁴ riche or poore
W12.82	Wiþ stones men sholde hir strike · and stone hire to deþe


W12.83	¶ A womman as I fynde⁶⁹⁵ · was gilty of þat dede
W12.84	Ac crist of his curteisie · þoruȝ clergie hir saued
W12.85	And þoruȝ caractes þat crist wroot · þe Iewes knewe hem-selue
W12.86	Giltier as afore god · and gretter in synne
W12.87	Than þe womman þat þere was · and wenten awey for shame


fol.69r


W12.88	¶ The Clergie þat þere was · conforted þe womman
W12.89	Holy kirke knoweþ þis · þat cristes writyng saued hire
W12.90	So clergie is confort · to creatures þat repenten
W12.91	And to mansede men · meschief at hire ende


W12.92	¶ For goddes body myȝte noȝt ben · of breed wiþ-outen clergie ⁶⁹⁶⁽ⁿ⁾
W12.93	The which body is boþe · boote to þe riȝtfulle ⁶⁹⁷⁽ⁿ⁾
W12.94	And deeþ and dampnacion · to hem þat deyeþ yuele ⁶⁹⁸⁽ⁿ⁾
W12.95	As cristes caracte confortede · and boþe coupable shewed
W12.96	The womman þat þe Iewes brouȝte · þat Iesus þouȝte to saue
W12.97	Nolite iudicare & non iudicabimini
W12.98	Riȝt so goddes body breþeren · but if it be worþili taken
W12.99	Dampneþ vs at þe day of dome · as þe caractes dide þe Iewes


W12.100	¶ For-þi I counseille þee for cristes sake · clergie þat þow louye
W12.101	For kynde wit is of his kyn · and neiȝe Cosynes boþe
W12.102	To oure lord leue me · for-þi loue hem I rede
W12.103	For boþe ben as Mirours · to amenden oure defautes
W12.104	And lederes for lewed men · and for lettred boþe


W12.105	¶ For-þi lakke þow neuere logik · lawe ne hise custumes
W12.106	Ne countreplede clerkes · I counseille þee for euere
W12.107	For as a man may noȝt see · þat mysseþ hise eiȝen ⁶⁹⁹⁽ⁿ⁾
W12.108	Namoore kan no Clerk · but if he cauȝte it first þoruȝ bokes ⁷⁰⁰⁽ⁿ⁾
W12.109	Al-þouȝ men made bokes · god was þe maister ⁷⁰¹⁽ⁿ⁾
W12.110	And seint Spirit þe Samplarie · & seide what men sholde write⁷⁰²


W12.111	¶ Riȝt so ledeþ lettrure · lewed men to Reson ⁷⁰³⁽ⁿ⁾
W12.112	And as a blynd man in bataille · bereþ wepne to fiȝte ⁷⁰⁴⁽ⁿ⁾
W12.113	And haþ noon hap wiþ his ax · his enemy to hitte ⁷⁰⁵⁽ⁿ⁾
W12.114	Namoore kan a kynde witted man · but clerkes hym teche ⁷⁰⁶⁽ⁿ⁾
W12.115	Come for al his kynde wit · to cristendom and be saued ⁷⁰⁷⁽ⁿ⁾
W12.116	Which is þe cofre of cristes tresor · and clerkes kepe þe keyes
W12.117	To vnloken it at hir likyng · and to þe lewed peple
fol.69v
W12.118	Ȝyue mercy for hire mysdedes · if men it wole aske
W12.119	Buxomliche and benigneliche · and bidden it of grace


W12.120	¶ Archa dei in þe olde lawe · leuytes it kepten
W12.121	Hadde neuere lewed man leue · to leggen hond on þat cheste
W12.122	But he were preest or preestes sone · Patriark or prophete
W12.123	For Clergie is kepere · vnder crist of heuene
W12.124	Was þer neuere no knyȝt · but clergie hym made
W12.125	Ac kynde wit comeþ · of alle kynnes siȝtes
W12.126	Of briddes and of beestes · of tastes of truþe and of deceites


W12.127	¶ Lyueris toforn vs · vseden to marke
W12.128	For selkouþes þat þei seiȝen · hir sones for to teche
W12.129	And helden it an heiȝ science · hir wittes to knowe
W12.130	Ac þoruȝ hir science⁷⁰⁸ sooþly · was neuere no soule ysaued
W12.131	Ne broȝt by hir bokes · to blisse ne to ioye
W12.132	For alle hir kynde knowynges come · but of diuerse siȝtes


W12.133	¶ Patriarkes and prophetes · repreueden hir science
W12.134	And seiden hir wordes and hir wisdomes · nas but a folye
W12.135	And⁷⁰⁹ to þe clergie of crist · counted it but a trufle
W12.136	Sapiencia huius mundi stulticia est apud deum ⁷¹⁰⁽ⁿ⁾


W12.137	¶ For þe heiȝe holy goost · heuene shal to-cleue
W12.138	And loue shal lepen out after · in-to þe⁷¹¹ lowe erþe
W12.139	And clennesse shal cacchen it · and clerkes shullen it fynde
W12.140	Pastores loquebantur adinuicem


W12.141	¶ He spekeþ þere of riche men riȝt noȝt · ne of riȝt witty
W12.142	Ne of lordes þat were lewed men · but of þe hyeste lettred oute
W12.143	Ibant magi ab oriente


W12.144	¶ If any frere were founde þere · I ȝyue þee fyue shillynges
W12.145	Ne in none burgeises⁷¹² cote · was þat barn born


fol.70r


W12.146	¶ But in a Burgeises place · of Bethlem þe beste
W12.147	Set non erat ei locus in diuersorio · et pauper non habet diuersorium⁷¹³


W12.148	¶ To pastours and to poetes · appered þe Aungel
W12.149	And bad hem go to Bethlem · goddes burþe to honoure
W12.150	And songe a song of solas · Gloria in excelsis deo


W12.151	¶ Clerkes knewen it wel · and comen wiþ hir presentz
W12.152	And diden homage honurably · to hym þat was almyȝty


W12.153	¶ Why I haue told al þis · I took ful good hede
W12.154	How þow contrariedest clergie · wiþ crabbede wordes
W12.155	How þat lewed men liȝtloker · þan lettrede were saued
W12.156	Than clerkes or kynde witted men · of cristene peple
W12.157	And þow seidest sooþ of somme · ac se in what manere


W12.158	¶ Tak two stronge men · and in Themese cast hem ⁷¹⁴⁽ⁿ⁾
W12.159	And boþe naked as a nedle · hir noon sikerer þan ooþer ⁷¹⁵⁽ⁿ⁾
W12.160	That oon haþ konnynge and kan · swymmen and dyuen ⁷¹⁶⁽ⁿ⁾
W12.161	That ooþer is lewed of þat labour · þat⁷¹⁷ lerned neuere swymme ⁷¹⁸⁽ⁿ⁾
W12.162	Which trowestow of þo two · þat⁷¹⁹ is in moost drede ⁷²⁰⁽ⁿ⁾
W12.163	He þat neuere ne dyued · ne noȝt kan of swymmyng ⁷²¹⁽ⁿ⁾
W12.164	Or þe swymmere þat is saaf · by so hym-self like ⁷²²⁽ⁿ⁾
W12.165	Ther his felawe fleteþ forþ · as þe flood likeþ ⁷²³⁽ⁿ⁾
W12.166	And is in drede to drenche · þat neuere dide swymme ⁷²⁴⁽ⁿ⁾


W12.167	That swymme kan noȝt I seide · it semeþ to my wittes


W12.168	¶ Right so quod þe renk · Reson it sheweþ
W12.169	That he þat knoweþ clergie · kan sonner arise ⁷²⁵⁽ⁿ⁾
W12.170	Out of synne and be saaf · þouȝ he synne ofte ⁷²⁶⁽ⁿ⁾
W12.171	If hym likeþ and lest · þan any lewed leelly ⁷²⁷⁽ⁿ⁾
W12.172	For if þe clerk be konnynge · he knoweþ what is synne ⁷²⁸⁽ⁿ⁾


fol.70v


W12.173	¶ And how contricion wiþ-oute confession · conforteþ þe soule ⁷²⁹⁽ⁿ⁾
W12.174	As þow seest in þe Sauter · in Salmes oon or tweyne ⁷³⁰⁽ⁿ⁾
W12.175	How contricion is comended · for it cacheþ awey synne ⁷³¹⁽ⁿ⁾


W12.176	Beati quorum remisse sunt iniquitates · & quorum tecta sunt &c


W12.177	¶ And þis conforteþ ech a clerk · and couereþ hym fro wanhope
W12.178	In which flood þe fend · fondeþ a man hardest
W12.179	Ther þe lewed liþ stille · and lokeþ after lente
W12.180	And haþ no contricion er he come to shrifte · & þanne kan he litel telle
W12.181	But as his lores-man lereþ hym · bileueþ and troweþ
W12.182	And þat is after person or parissh preest · þe whiche ben⁷³² par-auenture
W12.183	Vnkonnynge to lere lewed men · as luc bereþ witnesse
W12.184	Dum cecus ducit cecum &c


W12.185	¶ Wo was hym marked · þat wade moot wiþ þe lewed
W12.186	Wel may þe barn blesse þat man⁷³³ · þat hym to book sette ⁷³⁴⁽ⁿ⁾
W12.187	That lyuynge after lettrure · saueþ hym lif and soule ⁷³⁵⁽ⁿ⁾
W12.188	Dominus pars hereditatis mee · is a murye verset
W12.189	That haþ take fro Tybourne · twenty stronge þeues
W12.190	Ther lewed þeues ben lolled vp · loke how þei be saued


W12.191	¶ The þef þat hadde grace of god · on goodfryday as þow spekest
W12.192	Was for he yald hym creaunt · to crist on þe cros · & knewliched hym gilty
W12.193	And grace asked of god · þat to graunten it is redy⁷³⁶
W12.194	To hem þat⁷³⁷ buxomliche biddeþ it · and ben in wille to amenden hem
W12.195	Ac þouȝ þat þeef hadde heuene · he hadde noon heiȝ blisse
W12.196	As Seint Iohan and oþere Seintes · þat deserued hadde bettre


W12.197	¶ Riȝt as som man yeue me mete · and amydde þe floor sette me⁷³⁸ ⁷³⁹⁽ⁿ⁾
W12.198	And⁷⁴⁰ hadde mete moore þan ynouȝ · ac noȝt so muche worshipe ⁷⁴¹⁽ⁿ⁾
W12.199	As þo þat seten at þe syde-table · or wiþ þe souereynes of þe halle ⁷⁴²⁽ⁿ⁾
W12.200	But sete as a beggere bordlees · by my-self on þe grounde ⁷⁴³⁽ⁿ⁾
W12.201	So it fareþ by þat felon · þat a good friday was saued ⁷⁴⁴⁽ⁿ⁾
fol.71r
W12.202	He sit neiþer wiþ Seint Iohan · Symond ne Iude ⁷⁴⁵⁽ⁿ⁾
W12.203	Ne wiþ maydenes ne with martires · Confessours ne wydewes ⁷⁴⁶⁽ⁿ⁾
W12.204	But by hym-self as a soleyn · and serued on erþe ⁷⁴⁷⁽ⁿ⁾
W12.205	For he þat is ones a þef · is euere-moore in daunger ⁷⁴⁸⁽ⁿ⁾
W12.206	And as lawe likeþ · to lyue or to deye ⁷⁴⁹⁽ⁿ⁾
W12.207	De peccato propiciato · noli esse sine metu
W12.208	And for to seruen a seint · and swich a þef togideres
W12.209	It were neiþer reson ne riȝt · to rewarde hem boþe yliche


W12.210	¶ And riȝt as Troianus þe trewe knyȝt · dwelte noȝt depe in helle
W12.211	That oure lord ne hadde hym liȝtly out · so leue I þe þef be in heuene
W12.212	For he is in þe loweste of heuene · if oure bileue be trewe
W12.213	And wel loselly he lolleþ þere · by þe lawe of holy chirche
W12.214	Qui reddit vnicuique iuxta opera sua &c


W12.215	¶ And why þat oon þeef on þe cros · creaunt hym yald
W12.216	Raþer þan þat ooþer þeef · þouȝ þow woldest appose
W12.217	Alle þe clerkes vnder crist · ne kouþe þe skile assoille
W12.218	Quare placuit quia voluit


W12.219	¶ And so I seye by þee · þat sekest after þe whyes
W12.220	And a-resonedest Reson · a rebukynge as it were
W12.221	And of þe floures in þe Fryth · and of hire faire hewes
W12.222	Wher-of þei cacche hir colours · so clere and so briȝte
W12.223	And willest of briddes & of beestes · and of hir bredyng to knowe
W12.224	Why some be alouȝ & some aloft · þi likyng it were
W12.225	And of þe stones and of þe sterres · þow studiest as I leue
W12.226	How euere beest ouþer brid · haþ so breme wittes


W12.227	¶ Clergie ne kynde wit · ne knew neuere þe cause
W12.228	Ac kynde knoweþ þe cause hym-self · and no creature ellis
W12.229	He is þe pies patron · and putteþ it in hir ere
W12.230	There⁷⁵⁰ þe þorn is þikkest · to buylden and brede
W12.231	And kynde kenned þe pecok · to cauken in swich a kynde
fol.71v
W12.232	And kenned Adam ·^751(c) to knowe hise pryue membres
W12.233	And tauȝte hym and Eue · to helien hem wiþ leues


W12.234	¶ Lewed men many tymes · maistres þei apposen
W12.235	Why Adam ne hiled noȝt first · his mouþ þat eet þe Appul
W12.236	Raþer þan his likame alogh · lewed asken þus clerkes


W12.237	Kynde knoweþ whi he dide so · ac no clerk ellis
W12.238	Ac of briddes and of beestes · men by olde tyme
W12.239	Ensamples token and termes · as telleþ þe poetes
W12.240	And þat þe faireste fowel · foulest engendreþ
W12.241	And feblest fowel of fliȝt is · þat fleeþ or swymmeþ
W12.242	And þat þe pecok & þe Pehen · proude riche men bitokneþ ⁷⁵²⁽ⁿ⁾
W12.243	For þe Pecok and men pursue hym · may noȝt flee heiȝe ⁷⁵³⁽ⁿ⁾
W12.244	For þe trailynge of his tail · ouer-taken is he soone ⁷⁵⁴⁽ⁿ⁾
W12.245	And his flessh is foul flessh · and his feet boþe ⁷⁵⁵⁽ⁿ⁾
W12.246	And vnlouelich of ledene · and looþ for to here


W12.247	¶ Right so þe riche · if he his richesse kepe ⁷⁵⁶⁽ⁿ⁾
W12.248	And deleþ it noȝt til his deeþ-day · þe tail of alle sorwe ⁷⁵⁷⁽ⁿ⁾
W12.249	Riȝt so as þe pennes of þe pecok · peyneþ hym in his fliȝt ⁷⁵⁸⁽ⁿ⁾
W12.250	So is possession peyne · of pens and of nobles ⁷⁵⁹⁽ⁿ⁾
W12.251	To alle hem þat it holdeþ · til hir tail be plukked ⁷⁶⁰⁽ⁿ⁾


W12.252	¶ And þouȝ þe riche repente þanne · and birewe þe tyme
W12.253	That euere he gadered so grete · and gaf þer-of so litel
W12.254	Thouȝ he crye to crist þanne · wiþ kene wil I leue
W12.255	His ledene be in oure lordes ere · lik a pies chiteryng
W12.256	And whan his caroyne shal come · in caue to be buryed
W12.257	I leue it flawme ful foule · þe fold al aboute
W12.258	And alle þe oþere þer it lith · enuenymeþ þoruȝ his attre


W12.259	¶ By þe po feet is vnderstande · as I haue lerned in Auynet
W12.260	Executours false frendes · þat fulfille noȝt his wille
fol.72r
W12.261	That was writen and þei witnesse · to werche riȝt as it wolde
W12.262	Thus þe Poete preueþ · þat þe pecok · for hise feþeres is reuerenced ⁷⁶¹⁽ⁿ⁾
W12.263	Riȝt so is þe riche · by reson of hise goodes ⁷⁶²⁽ⁿ⁾


W12.264	¶ The larke þat is a lasse fowel · is moore louelich of ledene ⁷⁶³⁽ⁿ⁾
W12.265	And wel a-wey of wynge · swifter þan þe Pecok ⁷⁶⁴⁽ⁿ⁾
W12.266	And of flessh by fele fold · fatter and swetter ⁷⁶⁵⁽ⁿ⁾
W12.267	To lowe libbynge men · þe larke is resembled ⁷⁶⁶⁽ⁿ⁾


W12.268	¶ Aristotle þe grete clerk · swiche tales he telleþ
W12.269	Thus he likneþ in his logik · þe leeste fowel oute
W12.270	And wheiþer he be saaf or noȝt saaf · þe soþe woot no clergie
W12.271	Ne of Sortes ne of Salomon · no scripture kan telle
W12.272	Ac god is so good I hope · þat siþþe he gaf hem wittes
W12.273	To wissen vs weyes þer-wiþ · þat wissen vs to be saued
W12.274	And þe bettre for hir bokes · to bidden we ben holden
W12.275	That god for his grace · gyue hir soules reste
W12.276	For lettred men were lewed men yet · ne were loore of hir bokes


W12.277	¶ Alle þise clerkes quod I þo · þat in⁷⁶⁷ crist leuen
W12.278	Seyen in hir Sermons · þat neiþer Sarsens ne Iewes
W12.279	Ne no creature of cristes liknesse · with-outen cristendom worþ saued


W12.280	¶ Contra quod ymaginatif þoo · and comsed for to loure
W12.281	And seide Saluabitur vix Iustus in die Iudicij
W12.282	Ergo saluabitur quod he · and seide namoore latyn


W12.283	¶ Troianus was a trewe knyght · and took neuere cristendom
W12.284	And he is saaf so seiþ þe book · and his soule in heuene
W12.285	For þer is fullynge of Font · and fullynge in blood shedyng
W12.286	And þoruȝ fir is fullyng · and þat is ferme bileue
W12.287	Aduenit ignis diuinus non comburens set illuminans &c


W12.288	¶ Ac truþe þat trespased neuere · ne trauersed ayeins his lawe
fol.72v
W12.289	But lyueþ as his lawe techeþ · and leueþ þer be no bettre
W12.290	And if þer were he wolde amende · and in swich wille deieþ
W12.291	Ne wolde neuere trewe god · but truþe were allowed
W12.292	And wheiþer⁷⁶⁸ it be worþ or noȝt worþ · þe bileue is gret of truþe
W12.293	And an hope hangynge þer-Inne · to haue a mede for his truþe


W12.294	¶ For Deus dicitur quasidansvitam eternam · suis · hoc est fidelibus
W12.295	Et alibi · si ambulauero in medio vmbre mortis


W12.296	¶ The glose graunteþ vp-on þat vers · a greet mede to truþe
W12.297	And wit and wisdom quod þat wye · was som-tyme tresor
W12.298	To kepe wiþ a commune · no catel was holde bettre
W12.299	And muche murþe and manhod · and riȝt wiþ þat he vanysshed

Scribal | Critical | All Tags

Next: Passus 13 Previous: Passus 11 Up: Contents

[Preface | Introduction | Instructions | Abbreviations]
[Piers Plowman Electronic Archive | Frequently Asked Questions | Feedback]

Last updated: Sept. 27, 2000.
© Piers Plowman Electronic Archive